瀨尿童童

法法:

汪汪~

不得了喇! 童童又有新攪作...佢激到 Daddy 同 Mommy 生蝦咁跳呀!

噚晚 Daddy 開0左房門...個衰妹趁無人為意跳上床瀨尿尿呀!

仲要連冷氣被都瀨埋... Daddy 同 Mommy 漏夜要洗床單床墊 & 冷氣被呀~

Mommy 話呢個臭童童越0黎越目中無人不特止...仲挑戰成家既皮質醇...佢好嬲...話唔俾飯佢食~ 但係偏心既 Daddy 呢...話唔俾飯佢食的話連我都無得食呀!!!!

無天理丫!!!! Mommy 同 Daddy 理論...邊個做錯就邊個受罰...天經地義丫~ 有乜理由我無做錯事都要受埋一份喎!

何況呀...我係 Daddy 發現童童瀨尿時...已經立即衝去自己個私家廁所以尿尿俾 Daddy 睇以便明哲保身.... Daddy 你明明見到 & 知道唔關法豬事...你都要罰埋我既? 你幾時做0左昏君呀!!!

最後... 偏心既 Daddy 一持己見...唔罰做錯事既童童...照樣開飯俾佢食~ 而我呢? 當然都有份食喇...但係 Daddy 實在偏心到出晒面....我越0黎越唔鍾意佢喇! 汪!

噚晚 Mommy 心情已經唔多開心....臭童童仲激多媽咪兩錢重...吼...咬死你呀臭童!

回味無窮滑嘟嘟

法法:

汪汪~

今晚....愛生事家庭又發生一單驚人既事件...事源媽咪煮既百吃不厭豉油雞翼又出場~

噚晚佢整0左六隻....自己食0左三隻之後就俾 Daddy 等佢食埋淨下果三隻...點知 Daddy 話抖一陣先食....於是就放0左係餐枱上面喇!

Daddy 人有三急去解決要事時....膽大包天既童童怪獸趁機跳上餐凳....再爬上餐枱....一啖一隻咁連骨吞0左三隻雞翼~ 由於佢既行動既敏捷又迅速也乾脆夾利落....係佢鯨吞三隻雞翼時....背住佢坐既老女人一 D 都察覺唔到有事發生....連我呢個機靈活潑可愛小神犬 ( ! ) 都唔知呢份事發生...直至童童怪獸鯨吞完雞翼後...去舐埋碟上面果幾滴豉油汁而發出 "嗒嗒" 聲...老女人先驚覺出事....馬上連跑帶喝的去阻止童童怪獸再舐 D 汁~

Daddy 同老女人立即封鎖現場去重組案情時....摸擬到案發路線及經過~ 而且有奶油相信....童童怪獸係無0趙過隻雞翼原隻吞落肚...一來因為老女人完全無聽過食0野既聲....二來...長長0地既雞中翼...極度方便 由口空 "跣" 入食道......加上滑嘟嘟既雞皮....Daddy 同老女人相信如果童童怪獸識講0野的話...一定會學 "刀刀" 講句 "嘩阿女....一放入口即跣落去....滑到丫~!!!"

就係咁....乖既小狗如我無得食雞翼....但果 D 曳既小狗呢....就大朶快頤大啖大啖吞雞翼呀! 事後我猛叫童童怪獸劈大個口俾我聞嗄豉油汁陣味.....噢 O o o.....我0地狗仔 D 食物全部都顏色漂亮....但估唔到大人平時食果 D 豉油黑忟忟咁....原來咁香....咸中帶鮮...鮮中帶甜....甜中帶滑....滑中又無鹽喎! 狗仔既零食無一能及呀!

童童怪獸你就好喇...我好羡慕妳有豉油雞翼食.....如果可以食到豉油雞翼...我情願做隻曳小狗喇!

超! 橫掂我曳唔曳老女人都咁鍚我咖喇!

飛鷹行動 (三)

法法:

汪~ 好開心...個老女人又一次離家出走去 XX 2 日咁多....由於佢想同婆婆一齊出發...於是早一晚入0左婆婆屋企訓....變相佢頭尾係三日兩夜唔係屋企啊哈!!!

三日兩夜無王管的日子...Daddy 同我同童童都異常期待!!!

因為三條狗 (Daddy 屬狗咖嘛!) 終於可以好麻甩咁係廳到剝花生飲啤酒唔抹手就上床訓~~!!! 好疏乾咖!!!!

如果老女人係到...又會吱吱喳喳咁董太上身咁哇哇叫 "洗手洗手洗手~~!!"

好煩咖嘛...男人同老狗點會郁 D 嫌污糟嗄嗄都去洗手丫? 好囉...可以唔洗手三日....YOYOYOYO!

不過呢...老女人你去三日好喇...三日後好快 D 返....我知你星期一放假準備整芝士雞肉丸我食咖~

至多我星期日晚洗定手等你返0黎驗查我對臭手丫!

好大對比

家中的寶貝...每每眼眉 "稍" 到我去拿洗耳仔的藥水或 Q-Tip...便會雞走狗走的四出逃去~

剛剛...被童童發現拿手中拿著 Q-Tip (已經把它藏在手心...但那小小露出的部份被童童確定時辰到...洗!!)....立即衝落地 "趴" 在地上把肚皮緊貼地磚....你有張良計...我也有過牆梯~

我肉緊的急速叫喚 "童童童童蟲蟲蟲蟲..."....臭囡豬一向一聽到我們呼喚他的名字會連走帶跑的衝過來逃上你身上舐個不停~ 今次呢...明顯見到她想起身...但怕中計....又想起身...又怕中計...於是身體在地上 "典" 呀 "典"....好像一條爬行的毛蟲般....見到她的模樣...我笑了...放下 Q-Tip 把她抱起....摸嗄狗頭仔安撫一會才開始幫她清潔耳朶~

之後到法法了...其實囝囝對洗耳仔不是太抗拒...但見到童童驚...佢又走去驚埋一份 (好似吸塵機咁...原本佢唔驚咖...我0地可以將條管放在他身上吸走多餘的毛髮...而整個過程他是攤係地下唔郁...任你將佢反來反去的吸前吸後吸 左吸右~ 但後來佢見到妹妹驚...又走去驚埋一份....好學唔學!!! 同輩的影響果真大呀嗄!)...我空手走去抱佢...佢 "0胡" 我呀!!!!!

大膽!!!! 係呢個屋企邊個夠膽 "0胡" 德高望重既老虎媽媽????

我拍了拍他的狗頭責罵了兩句....他還不是乖乖的被我抱起...放在大腿上慢慢的清潔耳仔~ 其實佢跟本就唔驚亦唔討厭呢個動作...但偏偏人驚佢又 "扮" 驚!!!!! 學人跟瘋...哼哼!!!

但是呢...另一相反奇境出現在我手拿擦毛的大把梳.....童童每次見到....雙眼發光立即跳下來一股惱兒的自動自覺跑進浴室...而法法呢....又會企係浴室傍邊的走廊等成為下一位寵幸喎!

其實...法法對梳毛不是太喜愛呀 (他愛我們用手 R 肚肚呀脾隙果 D 位)...但又有樣學樣咁學人愛上梳毛....臭豬法法...下次幫你分九一界好唔好?

NAT GEO WILD (Pregnancy)

今天的 NGW....講動物的懷孕過程!!!!!

我回家晚了....錯過了小狗的孕育期....祗見到海豚及大象!

海豚....高佔我最愛的動物的第二位! (第一位還用問嗎?).....原來一個海豚媽媽由懷孕到生育要花上整整一年的時間.... NGW 用了不知葚麼的方法把海豚 BB 在母體內的成長過程記錄下來~

嘩嘩嘩....海豚 BB 由小小一個菠蘿包時...已經有海豚的初型.....長長的咀巴...小小的背鰭喇....側鰭喇...已經似模似樣的凸了出來....而眼睛的位置呢...亦微微的凸起....海豚 BB 刻意把身體彎曲及將鰭摺起以減輕海豚媽媽的辛苦~

NGW 把不同懷孕期的海豚 BB 拍出來....BB 越大...樣子越趣緻....請想像汪阿姐色的皮膚...大大的頭及隆額...短小又不合比例身體....cute 到不得了!!!!!!

後來 NGW 把一個快將分娩腹大便便的的海豚媽媽來一個全身照....噢.......懷孕的母親是最美麗的這句果真沒錯~~~!! 海豚的出生跟人相反...是先由尾部伸出產道... BB 全完識 "訂" 及合作把尾鰭微微向下垂及依然摺起側鰭以免弄傷媽媽~ (好乖好生性的寶寶啊!!!!) 慢慢地...海豚 BB 全個的出來了....海豚媽媽也 "her" 一聲的流出大量的血喇! 看到這裡...我眼都紅了...上帝將生兒育女的天職賜給女性...這個經歷...祗有懷孕的媽媽才能感受得到.....當媽媽果然是好偉大啊!

海豚 BB 是小數初出生便開眼的動物...一出生第一件事要做的不是飲奶...是游向海面吸第一啖空氣! 如果 BB 未能及時去吸第一啖空氣會有機會不能長大....海豚媽媽跟 BB 中間有一種感應...BB 出生後會因為媽媽的指引游去海面透氣~ 看到海豚 BB 貼著媽媽的向上游呀游...最終游上水面抖了豚生第一啖的氣!!! BB 安全了!!!

而初生的海豚 BB 每隔大約廿分鐘便要飲一次奶...每次啜幾啖....要隔一段時間才能啜多 D 奶啊!!!! (辛苦了媽媽啊!) 海豚的母乳含有很高的蛋白質...大約 33%...人類的祗有 4%...而脂肪含量亦很高啊...是 7%...人類的才有 1% 咋! (人奶跟海豚奶比...立見高張!)

由於海豚的皮膚每兩小時便全部更新一次...怪不得海豚永遠都擁有令我羨慕到暈的幼滑肌喇!!!!

而大象呢...整個懷孕期是 22 個月....咪講笑差唔多 2 年呀...是最長懷孕期的哺乳動物之冠!!!!

小象起初也很可愛...但祗限於未長頭毛象鼻未長過手手腳腳前喎~ 那時候的小像...鼻子翹翹...手腳奇短但極其粗壯喎....完全是卡通片中的 cute 爆小象囉!

縱使初生的小象不及海豚可愛...不過呢...可取之處是小象可以在出身後三十分鐘搖搖擺擺腳仔軟軟的站起來....雖然呢偶然會腳仔軟 "pang" 一聲倒下...但不久就可以行得似模似像喇!

人類的孕育片段看得多...動物的還是頭一次見!

除了大開眼界外...更令我對各界的母親獻上無限的尊崇及敬意!!!!!!

PS 後制

BB 的故事

近距離看到黑狗童童眉鬢間開始變白....想起了很多往日的回憶....也順帶想起了別人的故事~

因為法法童童的關係...認識了一班狗友 (no offense 全名為 "飼養小狗的朋友" )....大家偶然在街上碰到面...也會談一談近況 (其實...是談小狗的近況囉!)....大家的小狗由幾個月大...到現在未期壯年快成為老狗...狗友一見面...都會以暗號詢問對方的小狗健在與 否~

每次聽到有小狗走了......也不知先說安慰說話還是強忍掛在眼眶的眼淚~

狗友當中....以漂亮的 BB 的故事最為令我留下深刻印像~

BB 的主人 C 有天在閒談中告訴我......BB 是棄狗在街上執返來的~

兩年前......C 在將軍澳的單車徑側見到 BB 在烈日當空下暴曬....起初以為 BB 是走失了 (有狗帶青潔乾淨四四正正的...擺明是家狗!)...便陪他一起等喇...等呀等...人狗等了 2 小時也不見有人搵狗喎...於是...C 便把 BB 帶回家中 (當時狗隻要注射晶片的法例還沒執行....天大地大.....跟本不知在那裡為 BB 搵返他的主人!) ......就這樣....C 便將 BB 示如己出.....無微不至的照顧~

C 真的很鍚 BB 喎.....BB 亦對 C 非常的忠心....永遠緊隨腳邊~

有天和 BB 散步............忽然遇上一女子指著 BB 尖叫.....繼而一把的將 BB 抱入懷內~

原來...這女子是 BB 的主人....疼鍚 BB 的程度不下於 C ....亦因為這樣....他的男友看不過眼....有計劃的趁女友外遊不在香港把 BB 由沙田載到將軍澳.......遺棄了 BB .....等女友回來...便說 BB 走失了~ 女子找了 BB 很久....傷心失望的他當然沒找到 BB ....當時亦想不到男友這麼有機心把狗偷偷載到 "無雷公" 咁遠喇! (後來分手了....男的說出是自己固意遺棄了 BB 的事情去傷害女友~ 卑鄙又邪惡的壞蛋!!!!!)

新舊主人都很想把 BB 留在身邊...而且每人和 BB 相處的時間相約 (每人約兩年) ....於是倆人想出由 BB 自己決定!

[b] 新主人 C BB 舊主人[/b]

倆人各行一方...BB在中間......大家決定不叫喚 BB ...祗是站在那裡等 BB 決定......據 C 所講 (講時還要眼濕濕...) BB 的確有左望望右望望....神情像不知如何取捨~

最後....BB 毅然跑去 C ....舊主人亦尊重 BB 的決定....著 C 好好照顧 BB 哭著的離去~

我聽這個真人 (狗?) 真事的故事時.......眼淚也忍不住的流出來......一來為賤男的惡行而感到憤怒....二來新舊主人對 BB 的尊重及文明的讓 BB 自己決定而感動....三來看到 BB 那又大又漂亮的眼睛時....想像到他人 (狗?) 生交叉點的要決定自己的下半生時....再也忍不住哭了~

上年在街上看到 C 和 BB 散步....高齡的 BB 依然是 baby face....但 C 說已經做好心理準備 BB 快要走了~

往後...我沒有碰過 C 和 BB.....不知 BB 現在身處何方.......但每次在街上看到歌基時....也想起 BB 的故事~