法法:
汪~
星期日晚....我肥豬仔咁係屋企巡來巡去....見到童童係餐凳上打狗餅....佢好似訓得好 "淋" 咁....我見平時 Daddy Mommy 見對方訓著覺仔都會走埋摸嗄對方個頭/面咁....我咪又有樣學樣咁走埋 "哄" 嗄童童囉~
點知個屎妹丁係假訓....我個狗頭仔一伸埋去...都未開始聞佢面面....佢就大巴大巴咁車埋0黎我到....我成個狗俾佢車到飛埋一邊....好可憐呀我! 我諗住主動 D 伸出友誼之頭...點解換來唔友誼之手係掌摑之手??? 我真係苦命喇!
Daddy 見到晒成個情況發生....但佢淨係掛住笑...唔教訓童童~ 仲當笑話咁話返俾 Mommy 聽添!!!
我即時以行動投訴....走埋佢狗奴身邊....運用我演藝時學到既絕門演技 "我見猶憐"
....用我既大眼睛....谷行淚水....但又唔滴出0黎......洽到好處咁以 35 度微微抬高狗頭仔咁望住
Daddy....不出我所料...Daddy 招ed (招ed 係 out 爆既 Mommy 教我咖...佢話果時 YES
成日講呢個潮語咖!)....即時抱起我又呵又氹....BINGO!!!!
轉頭...佢當我波兒咁交0左俾 Mommy....Mommy 又當我湯丸咁又搓又鍚0左我好多啖補數...仲係我耳邊輕輕講0左句
"放心...搵日我車返佢三巴幫你補數!" 添~ 嘩! 我條氣即刻 "鋸" 晒.....嘿嘿....Daddy
唔係屋企果四日我睇你個油瓶女得戚得去邊~!
沒有留言:
張貼留言